Популарен француски ресторан 50 години послужува само едно јадење

Култура
•
5 јануари 2024

Можеби звучи чудно, но ресторанот Le Relais De L’Entrecôte во Париз нема мени, послужува само едно јадење и на овој начин успешно работи веќе 50 години.

Тој е толку популарен што не прима ни резервации, а за место се чека најмалку 30 минути. Штом ќе седнете, келнерката прашува какво го сакате месото– а опциите се rare, medium и well done.

Освен на трите локации во Париз, овој ресторан го има и во Женева и Цирих, а добрата репутација се должи на вкусното и меко месо коешто се послужува со специјален сос, зелена салата со ореви и домашен помфрит.

Келнерките прво ја носат салатата, па кога ќе завршите стигнува месото со компирчињата, но само половина...

Останатиот дел намерно го оставаат за подоцна за да не го јадете ладен, а помфрит може да нарачувате колку сакате.

За овој оброк ќе платите 29 евра, а може да го збогатите со чаша црвено вино.

Иако ресторанот служи само едно главно јадење, сепак има мени за десерти, па така на сладок начин ќе ја заокружите оваа гастро авантура.

 

Објавено:
5 јануари 2024
Категорија: 
Култура