Артистична пролет на Роберт Ивановски

Вообичаено македонскиот дизајнер Роберт Ивановски своите колекции ги дефинира во монохроматски стил, претежно со доминација на црна, бела или црвена боја. Но, неговата последна колекција за сезоната пролет-лето 2016 насловена „Feelings" што ја промовираше на претходното издание на FWSK, е вистинско олицетворение на пролетниот колорит.

„Колекцијата 'Feelings' е инспирирана од природата и нејзината обоеност, поп културата и моите чувства низ годината. Доминантни бои се белата и зелената, збогатена е со апстрактни принтови изработени од сликарите Елена Чемерска и Бојан Ковски", вели дизајнерот за Fashionel.

Соработката со двајцата сликари и дава дополнителен артистичен доем на колекцијата во која се застапени парчиња облека наменети за двата пола.

За „Feelings" неодамна дизајнерот направи и едиторијал со моделите Ана Ежова и Леуарт Лека, фотографиите ги направија Ани и Дими, а шминката и фризурата се на Фран.