Современа интерпретација на кубизмот во новата колекција на македонската етикета „Mariguccha“

Вчеравечер во Младинскиот културен центар во Скопје, младата македонска креаторка Нела Тодоровска која твори зад етикетата „Mariguccha" нè изнесе надвор од стандардниот моден шаблон преку, за неа карактеристичниот, артистичен и неконвенцонален принцип на промоција на нејзините колекции.

Тргнувајќи од контекстот – модата е и психологија, Нела во својата нова есен/зима колекција го истражува кубизмот трансформирајќи го во повеќеслојни интерпретации што одговораат на авагнардниот современизам.

Резултатот е колекција која се базира на основни форми во кои акцентот е на функционалноста, носливоста и безродовата естетика - со индивидуализмот како заеднички предзнак.

„Почнувам од една минимална, чиста форма на кројка/конструкција која ја анализирам, подоцна ја деконструктивирам и повторно ја соединувам во ансамбл на тридемензионалност. Целата колекција содржи основни форми кои произлегуваат од човечкото тело и се трансформираат во геометриски форми кои имаат функционалност и се прилагодени на истото. Формата ја следи функцијата, слободен пресек на волумен и судир на повеќе форми во една. Сликата од Picaso „Госпоѓиците од Авињон" е еден пример за инспирација на оваа колекција, четири голи жени насликани една до друга, секоја во различна позиција од другата и нивните тела насликани во делови. Кубизмот го спојувам со модата од 20-тите години, односно, машката мода носена од жена. Во тоа време жена да носи панталони и тоа како не било опшествено прифатливо, се сметало за невкусно и обратно од тоа што е нормално. Прво почнале со панталони до колена, кои личеле на подпанталона. Се сметале за многу пријатни и функционални, се изјаснувале дека се добри за јавање, планинарење, тенис и играње голф, за подоцна да почнат да ги носат и оние жени кои не практикуваат спорт. Helmut Newton во една од неговите фотосесии прикажува фотографии во кои ја доловува машкоста во жената.
"The right woman dressed and made up like a man looks far more chic than any man possibly could." -Helmut Newton", вели дизајнерката во своето објаснување за концептот на колекцијата.

Тогаш и сега, облеката го идентификува човекот и неговата професија, психологијата се состои во модата како акцесоар на животен стил. Ненаситност и експериметирањето на модата доведува до една конфузност каде во денешно време е прифатливо машко да носи женска облека и обратно. Губење во граници и либералност на живот. Сега е времето во модата за кое што претходните генерации се обидувале да го сменат, а ние сега го живееме и е дел од нашето секојдневие.

Колекцијата содржи 20 целосни аутфити. Сите аутфити во колекцијата се двострани, носливи од лице и опачина. Имаат мултифункционалност и се носат на повеќе начини, а се наменети и за двата пола.