Менаџерката за комуникации на Живанши – успешна бизнис жена која практикува деловен стил со слободен дух

Портфолио
•
3 јули 2023

Валери Леберишел е влијателно име во светот на комуникациите во високите модни кругови.
По долгогодишно искуство на челни комуникациски позиции во светски познати модни брендови, минатата година застана на менаџерската позиција за глобални комуникации и во етаблираната модна куќа Живанши.

Претходно поминала девет години како директор за комуникации во групацијата Прада, каде дошла од истата позиција во Селин, каде исто така поминала една деценија.

Во нејзиното портфолио се набројуваат и модните брендови Исеј Мијаке и Жан Луи Шерер, што укажува на нејзината плодна и успешна кариера во модната индустрија, па како таква нејзиниот деловен имиџ е предмет од особен интерес.

Во нејзиното најново интервју за Вог, ќе каже дека преферира контрасти – што особено е воочливо во нејзиниот деловен имиџ.

Како пример ќе го наведеме нејзиното умешно синхронизирање на едноставните и минималистички линии со по некој ексцентричен и храбар принт или дезен.

Таков „спој на контрасти" во нејзиниот стил е присутен и преку комбинирањето на женствени и унисекс парчиња или пак парчиња од различни сезони (неретко носи макси капути во комбинација со отворени летни сандали).

И можеби тој нејзин пристап е она што го прави нејзиниот стил уникатен.

 „Ја сакам модата уште од најрана возраст", ќе рече во истото интервју, каде открива дека низ своето „стилско созревање" поминала низ сите можни фази, од наједноставен, базичен и елегантен стил до панк фаза на избричена глава под влијание на музиката што ја слушата во периодот на 80-те.

Така „талкајќи" и барајќи се, дошла до себеси и вистинската таа. Онаа Валери која го следи својот инстинкт кога е во прашање стилот, која не се води од тенденциите туку точно знае што сака.

Интересни се нејзините први и најрани сеќавања за модата, што ги поврзува со една од нејзините тетки Парижанки, која во раните 70-те во една прилика ѝ оставила впечаток со тоа што носела сензационален кожен комбинезон во металик златна нијанса.

Уште тогаш, знаела да примети добар стил.

Како омилени модни икони ги наведува меѓу другите и Дејвид Боуви, Брајан Фери, Миуча Прада, Реи Кавабоко, Убер де Живанши и сите тие имале свое влијание во градењето на нејзиниот имиџ.

Фото: Вог

Објавено:
3 јули 2023
Категорија: 
Портфолио
Прочитано:
729 пати
Тагови: 
портфолио комуникации деловна жена Живанши