Deep Purple грмеа во Скопје – ги споија генерациите на концерт за кој долго ќе се раскажува

Можеби времето викендов во Скопје не беше добро, но музичката прогноза беше одлична!

Deep Purple згрмеа во салата Борис Трајковски, стишувајќи ги и грмотевиците надвор. И нема потреба од формалности за тоа со што го отвориле концертот, како се случувале нештата линеарно, бидејќи она што е најважно е емоцијата. Кога ќе видите генерации од кои и не очекувате да ги знаат Deep Purple, кога гледате генерации на вашите родители, дедо и внук заедно, мајка и ќерка заедно, сфаќате дека музиката што ја прават е безвременска и дека присуствувате на концерт кој ги брише сите граници.

Кога ќе видите дека Иан Гилан и екипата (најголемиот дел) се во осмата деценија од животот фрлаат такви искри енергија од бината, која не може да не ја почувствувате, во прв момент сте и збунети и си велите дека никогаш повеќе за никого во животот нема да речете дека е стар, бидејќи тие се најголемите „младичи" кои некогаш сте ги виделе. Нешто ново, нешто старо можеше да се слушне во саботата вечер, а се' така спакувано, да нема никаква разлика од датумот на „производство" на нивната музика.

За нивната големина говори и фактот што отсвиреа неколку такта од Јовано Јованке, со што покажаа огромна почит кон местото каде што настапуваат, а воопшто немаа проблем ниту да се заблагодарат, да се поклонат и да покажат колку сте искрено воодушевени од атмосферата и фибекот кој македонската публика им го овозможи и која им покажа, после околу 15 години од претходната средба, дека нашето срце и љубов кон музикатата воопшто не се намалиле. Овој концерт ќе го паметат и тие и ние, бидејќи заеднички направивме силен електричен спој, поголем од оние што во моментот ги имаше од другата страна на салата. Ништо немаше површно таа вечер, се' беше Deep - емоцијата, желбата, љубовта, музиката, сеќавањето, споменот.

Фото: Авалон, Стефан Рајхл