По низата скандали кои периодов го тресеа британското кралско семејство, вечерва на својот официјален профил на Инстаграм, Меган Маркл и принцот Хари објавија уште една голема вест која значително ќе ја промени атмосферата во семејствотo и нивната релација со неговите членови.
Пред неполн час војводата и војвотката од Сасекс официјално ѝ се обратија на јавноста преку соопштение на нивниот Инстаграм профил во коe подвлекуваат дека отстапуваат од нивните формални позиции на високи членови на британското кралско семејство и планираат финансиска независност, додавајќи дека имаат во план и да се преселат во Северна Америка.
„По повеќемесечни размислувања и интерни дискусии, решивме да направиме транзиција оваа година, започнувајќи нова улога во оваа институција. Имаме намера да се повлечеме од нашите улоги на високи членови на кралското семејство и да работиме на тоа да станеме финансиски независни, истовремено и понатаму целосно поддржувајќи го Нејзиното Височество. Со вашето охрабрување, особено последните неколку години, се чувствуваме подготвени да го направиме ова прилагодување. Сега планираме да го балансираме нашето време помеѓу Велика Британија и Северна Америка, продолжувајќи да ја почитуваме нашата должност кон кралицата и Комонвелтот..." се вели во нивното соопштение што во целост може да го прочитате подолу, на нивниот официјален Инстаграм профил.
Скандалите во кралското семејство се интензивираа уште со самото доаѓање на Меган Маркл како нивен нов член, а шпекулациите за разнишаните односи се засилија за време на празничниот период кога Меган и Хари заедно со нивниот син Арчи, божиќните празници ги поминаа надвор од протоколот на кралското семејство и беа на неколкунеделно патување во Канада.
За оваа одлука на брачниот пар веќе наголемо пишуваат сите светски медиуми.