Започна Serbia Fashion Week

Во студентскиот културен центар „Фабрика“, со ревијата „Heroes“ вчеравечер беше отворено годинешното издание на Serbia Fashion Week. На првата вечер се претставија повеќе од 20 дизајнери од Србија и регионот.

Дизајнерите што имаа чест со своите креации да се најдат на првиот ден од манифестацијата се селектирани од српскиот стилист и моден уредник, Срѓан Швељо, а како вели, инспирацијата за ваков, поинаков почеток на модната недела му бил модниот херој Дејвид Боуви.

-Кога истражував како Боуви изгледал во 1970-тите години, се шокирав од фотографиите што ги најдов. Многу потсетуваат на стајлинзите што јас денес ги правам, така што тој ми беше совршена инспирација и како моден херој и како музички херој, бидејќи тој во секој поглед е револуционерен – изјави Швељо.

Срѓан Швељо

Тој додава дека кога е машката мода во прашање, во моментот ѝ недостасуваат бои и принтови, за да се избегне монотонијата.

Помеѓу учесниците вчеравечер се најде и нашата дизајнерка Александра Јовановска, како и Бата Спасојевиќ, Марија Јаношевиќ, Томислав Бахориќ од Хрватска, Миро Мишљен од Словенија, Милан Сениќ од Босна и Херцеговина, Бошко Јаковљевиќ и многу други...

Како се вели во соопштението од Serbia Fashion Week,  алтернативниот амбиент на „Фабрика“ совршено се вклопил со екстравагантните и ексцентрични модели, а како лајт мотив што ги поврзува сите креации е силната шминка на лицата на машките манекени.

Модната недела ќе трае до 15-ти ноември, а во рамки на манифестацијата ќе се одржат и едукативни семинари, Pop Up продавници и изложбени салони.

Во сите денови, свои креации ќе прикажат повеќе од 70-креатори од земјата и светот.