Српската дизајнерка Инес Јанковиќ вчера пред српската публика ја презентираше својата најнова колекција за пролет/лето 2014, насловена „Glow”. Ова е четврта колекција на младата креаторка, која иако е речиси две години на модната сцена, постигна голем успех во соседството. Инспирацијата за колекцијата „Glow“ е актерката Мишел Фајфер во култниот филм „Scarface“ од 1983 година.
Инес овојпат се занимава со вонвременскиот гламур, пренесен во стилот на урбаните дами од светските метрополо. Во колекцијата доминираат фустани, здолништа, панталони, кошули и сакоа, дополнети со накит, кој исто така е нејзин дизајн и низ кој се протнуваат и футуристички елементи. Од боите, застапени се белата, сребрената и златната, но и пастелните нијанси на розева и зелена, а неизостануваат ниту популарните интензивни жолта и сина, како и неизбежната црна.