Српската премиерка замоли „Егзит“ да не се откажува туку да се одржи во август!

Иако ЕГЗИТ (Exit) фестивалот неодамна објави дека годинава нема да се одржи во својот стандарден формат и термин, премиерката на Србија Ана Брнабиќ вчера ги замоли организаторите да не го откажуваат фестивалот, изјавувајќи дека препорака на Кризниот штаб е одложување за август имајќи го предвид драстичното подобрување на здравствената ситуација во Србија, но и целиот регион и повеќето земји во Европа:

„Донесовме препорака ЕГЗИТ да се помести за август бидејќи очекуваме дека до тогаш ќе биде целосно смирена ситуацијата во цела Европа" им изјави српската премиерка на новинарите и додаде дека препораката е фестивалот да се одложи а не да се откаже.

Од тимот на ЕГЗИТ ја поздравија можноста во август да се одржи не само ЕГЗИТ фестивалот, туку и другите манифестации во Србија, како и препораката на епидемиолозите која е добра вест за сите, а особено за најпогодените сектори, туризмот и манифестациите. Во ЕГЗИТ тимот напомнуваат дека се спремни и на промена на форматот на фестивалот: „Ако биде потребно, ние сме спремни драстично да го намалиме капацитетот на фестивалот, како и да ги ограничиме посетителите само на домашна и регионална публика" изјавија организаторите и апелираа да се организира состанок на кој ќе се дефинираат сите детали и ќе се одговори на отворените прашања.

Оваа ударна вест која со голема брзина се шири на европската фестивалска сцена, ја прокоментираа и регионалните експерти во ивент-индустријата на синоќешниот панел за судбината на манифестациите.

„Ова е одлична вест, но и очекувана, имајќи предвид дека епидемијата во повеќето европски земји забрзано поминува. Србија направи паметен потег што прва објави ваква вест, бидејќи младите всушност ќе бидат првите кои патуваат и државите кои ќе го препознаат тоа побрзо ќе го опорават туризмот од другите", вели Павле Костадиновиќ од словенечката туристичка агенција „Супратравел".

Со него се согласува и Аднан Мехмедовиќ, признат хрватски промотер и коосновач на „Фреш Ајланд" фестивалот. „Ова е спектакуларна вест не само за регионот, туку за цела светска фестивалска индустрија чие опоравување почнува со Егзит. Се надевам дека и другите земји од регионот ќе ја препознаат приликата со цел што поскоро да се опорави фестивалскиот туризам по кој сме препознатливи ширум светот".