Вчера по повод 70-от роденден на еден од најзначајните македонски драматурзи и писатели, Горан Стефановски, беше претставен мурал со неговиот лик на фасадата на ООУ „Коле Неделковски" во скопско Дебар Маало.
Автор на муралот е уметникот и тату-артист Блаже Атанасков-Нејмлес, и истиот е дел од програмата на Општина Центар за одбележување на јубилејниот роденден на бардот на македонската драма.
Свое обраќање на настанот имаше и синот на Горан Стефановски, Игор, кој меѓу другото се осврна и на претставата „Моето име е Горан Стефановски" актуелна на репертоарот на Драмски театар, а која претставува еден вид на омаж на текстови на авторот кои до сега не биле поставени на сцена.
Во рамки на програмата беше изведен и драмски перформанс „Маалски драмски разговори" во паркчето во Дебар Маало каде е поставено и бронзеното спомен-обележје: клупа на која седи Горан Стефановски.
Авторот на најславната телевизиска серија во македонска продукција „Бушава азбука", почина во ноември 2018 година на 66-годишна возраст.
Неговите легендарни драми „Диво месо", „Лет во место", „Дупло дно", „Хај-Фај", „Тетовирани души", се лектира за сите генерации и имаат непроценлива вредност за македонското драмско творештво.