Кога правиме стилски комбинации со парчиња во метални нијанси, секогаш постои доза на ризик крајниот резултат да не биде очекуваниот. Честопати линијата помеѓу урбаниот уличен изглед и кичот е тенка, особено кога вметнуваме детали или облека со висок сјај.
За новогодишниот изглед, ризикот ќе се исплати доколку таквите парчиња соодветно и умерено ги комбинирате.
Многу е важно кога во вашиот стајлинг вметнувате парчиња во метални нијанси да балансирате со остатокот од деталите и парчиња облека кои треба да бидат во посмирен тон.
Ако вашето здолниште е во преливи од сјајни нијанси на зелена боја, тогаш блузонот нека биде со интересен натпис на пудреста основа , а капутот одберете го во истата боја. Финалната кул завршница ќе ја дадат деталите: мини ранец наместо чанта, очила во кружна форма и ѕвезден накит.
Ако целите кон тотално откачен-диско изглед, тогаш забавувајте се при изборот на парчињата! Веќе вие сте решиле дака сакате да изгледате необично и тоа ве прави среќни. Кулминација на фанки стилот е крзнената бундичка во повеќе бои.
Сите дами кои остануваат цврсто до својот женствен стил, а сепак претендираат да внесат несекојдневен шмек во празничниот стајлинг, може да комбинираат здолниште во А линија со геометриски принт и да го спојат со минималистички топ во сребрена боја. Највпечатливиот момент нека е мекото и удобно палто со пердуви во нежна розова боја и чевли во истата боја, но со висок сјај.
За оние урбани девојки кои сакаат да уживаат во привилегијата на удобноста во секоја прилика, препорачуванме предимензионирано палто, макси здолниште и чевли на висока платформа.
Спојот на спортска и елегантна облека е одличен избор за новогодишната ноќ. Зошто да не облечете патики и да уживате цела вечер играјќи на подиумот? Елеганцијата ќе ја постигнете многу едноставно, со избор на кратко црно сако и панталони со светки, а ќе финиширате со минимален накит, како на пример ситни обетки или лента со која ќе ја соберете косата.