Емотивно за Стиви Вондер од колегите...

Иако од доделувањето на Греми наградите помина цела недела, од организацијата одлучија да му посветат посебна вечер на легендарниот Стиви Вондер на која светски познати ѕвезди му оддадоа почит и признание пеејќи некои од неговите најпознати песни.

Како и на доделувањето на наградите, домаќин на настанот посветен на една од светските музички легенди беше раперот LL Cool J, кој заврши одлична работа на настанот што се одржа на 10 - ти февруари во Нокиа театарот во Лос Анџелес, а премиерно беше прикажан на CBS вчеравечер.

На музичката манифестација свои настапи имаа некои од најголемите музички ѕвезди на денешницата како Ариана Гранде, Ед Ширан, Лејди Гага, Нијо, Ашер и Бијонсе.

Вечерта ја отвори спектакуларната Бијонсе која откако кажа неколку прекрасни зборови за нејзиниот омилен Стиви, продолжи да пее во друштво на Ед Ширан цели девет минути. Одличен настап вечерта имаше и Лејди Гага која по кој знае кој пат ги покажа нејзините фантастични вокални способности, а на сцената ја остави и сета енергија што ја поседува.

Неверојатно енергичен настап на сцената имаа и раперот Нијо и ќерката на Стиви Вондер Ајша Морис која беше вистинско изненадување вечерта како за публиката, така и за нејзиниот татко кој се расплака кога и го слушна гласот.

За време на неговиот настап, вистински емотивен беше и моментот кога тој ги замоли присутните да ги затворат очите и едноставно да ја почувствуваат и доживеат музиката на начин на кој што тој тоа го прави.

На барање на светската музичка легенда, за кратко беа исклучени сите светла во арената, кога тој и го започна неговиот неверојатен настап.

Пред одличната манифестација, познатите ѕвезди позираа и со нивните омилени албуми од музичката легенда, а сосема очекувано, фотографиите се вистински празник за очи.

Андреа Бочели со неговиот омилен албум од Стиви Вондер

Во продолжение, погледнете дел од атмосферата на концертот посветен на еден од најголемите – Стиви Вондер!