Магијата на македонската природа пресликана во фотографиите на Стефанија Видовски Јанева

Интервју
•
28 јули 2022

Доколку следите патувачка содржина, особено онаа фокусирана на природните убавини на Македонија, невозможно е да не сте го забележале прекрасниот профил на @svidovski.

Стефанија Видовски Јанева веќе година ипол работи во маркетинг агенција, иако генерално со маркетинг се занимава уште од претходно. Но, покрај маркетингот како нејзина професионална љубов, таа се занимава и со фотографија, која во голема мера ја вклучува и во својата работа.

Таа за себе вели дека се вљубила во фотографирањето уште од рана возраст, a со текот на времето, ова хоби прераснува во значаен сегмент од нејзиниот живот. Фотографијата е нејзин издувен вентил и алатка за лична експресија.

Сепак, природата, планинарењето и неуморното истражување на руралните предели и природните богатства со кои плени нашава земја е неоспорна фасцинација на Стефанија која блика низ речиси секоја објава на нејзиниот Инстаргам профил.

- Ридови, планини, рамнини, врвови, села, реки, езера, потоци. Сето она што претставува извор на постоењето, а многу често го забораваме. Токму затоа повременото бегство од Скопје и престојот во природа е нешто без кое не можам да замислам да живеам. Лично верувам дека и токму крајната цел во овој брз, хаотичен живот е секој да си го пронајде мирот и спокојот враќајќи се назад кон корењата, а тоа е природата и сѐ поедноставниот (одржлив) начин на живот. - вели Стефанија.

На прашањето на кој начин ја спознава Македонија, Стефанија вели:

- Вечната моја фасцинација со природниот свет, а поконкретно ова мало зелено парче рај што се вика Македонија е љубов која ми е можеби во голема мера пренесена генетски од многу рана возраст. Од кога знам за себе, јас сум по шуми или по планини. „Виновниците" се секако дедо ми (активен планинар до својата 80 год) и баба ми, а потоа и моите родители кои немаат испуштено прилика да не понесат со себе на сите свои патувања и авантури низ земјава. Ова се почетоците, а ден денес уживам да го правам тоа со мојот партнер и моите пријатели со кои често си правиме екскурзии низ земјава кога и да се најде слободно време.

Патувањата на Стефанија се најчесто инспирирани спонтано од одредено место или предел кои го привлекло нејзиното внимние. Од моментот кога ќе ја одреди почетната точка, следниот чекор е отворање Google Maps за детална анализа. А од тука натаму, Стефанија вели дека ѝ е лесно да направи активна агенда за наредните 2-3 дена. Неретко тоа се и локации кои ги има посетено како дете, за кои има желба одново да ги искуси и да ги доживее на сосема поинаков начин.

Покрај неодоливата природа на оваа земја, патувањата и желбата за истражување на Стефанија се силно мотивирани и од сериозната, неопислива носталгија и поврзаност со стари градби, стари селски куќи и дворови, села кои навидум наликуваат како времето да застанало за нив.

- Самиот момент дека баш јас ја имам приликата да стапнам на место чии ѕидови имаат историја и свои приказни ми дава некое чудно чувство на смиреност и спокој. И секако, сè што е вода или покрај вода. Сèуште ништо не успеало да ме натера да не брцнам раце или нозе кога и да наидам на река, езеро, водопад, поток, па дури ни ниски температури. - вели Стефанија.

Во прилог погледнете некои од нејзините волшебни фотографии кои со сигурност ќе ве инспирираат да тргнете на истражувачко патување низ нашата прекрасна Македонија.

Објавено:
28 јули 2022
Категорија: 
Интервју
Прочитано:
545 пати
Тагови: 
колумна интервју Инстаграм профил патување туризам патување низ македонија природни убавини стефанија видовски јанева Македонија