„Електра“ ја отвори сезоната во МНТ: Драматично патување низ лавиринтите на човековата душа

Театарската уметност повторно ќе ги собира нашите воздишки. Со премиерата на претставата „Електра“ во режија на украинскиот режисер Андриј Жолдак вчеравечер во Македонскиот Народен Театар и официјално започна новата работна сезона за сите театарски уметници.

Ова е приказна за античката митолошка историја, за заклетвата и злосторството на едно кралство семејство, но и за тоа како Господ ги казнува децата на нашите деца. Една поинаква естетика која ги доловува и во целост прикажува и најскриените импулси во човекот, неговата темна страна и неговите внатрешни пориви.

„Сите ние сме одговорни за делата на нашите родители, баба и дедо, прабаба и прадедо (без оглед дали тоа ни се допаѓа или не), како и за нашите сопствени дела. Она што го правиме денес ќе има влијание врз нашите деца, но и врз децата на нашите деца“, вели режисерот.

Претставата истражува колку длабоко е скриена суровоста во човекот, т.е во неговата потсвест (која постои или е заспана) и во еден момент од минатото таа наеднаш излегува од него и станува сила која го контролира. Се поставува прашањето: „Колку длабоко се крие суровоста на човекот – еден или повеќе километри? И зошто се луѓето погруби и понасилни од животните и растенијата во одредени ситуации?“. Порано или подоцна се открива и се казнува секое помало или поголемо злосторство.

Денес во 21-от век, прашањето : „Какво е човечкото суштество во екстремни ситуации?“ сè уште останува неодговорено како и пред илјада години. Фјодор Михајлович Достоевски во една прилика рекол дека „човечката душа е во темнина“, а Георг Бухнер пак: „Ако погледнете во човечката душа, тоа е исто како да гледате во бездна, во главата ви се врти од она што го гледате“. Следејќи овие постулати целата претстава се базира врз основа на еден драматичен и насилен перформанс, како и едно патување низ лавиринтите на човековата душа.

Жолдак, важи за едно од најголемите режисерски имиња на денешницата во Европа. Тој е добитник на наградата „Уметник на УНЕСКО“ во 2004 година, а годинава се закити со највисокото признание  од областа на театарот во Русија „Златна Маска“ за режија.

Улогата на Електра и беше доделена на младата и неверојатна актерка Дарја Ризова, а во претставата играат и Александар Ѓорѓиески, Звездана Ангеловска, Александар Михајловски, Славиша Кајевски, Борче Начев и други. Костимографијата му беше доверена на Лукас Нол, а за музиката се погрижи Сергеј Патрамански.

Fashionel секако го проследи и црвениот килим пред почетокот на претставата, па во фокусот на фотообјективот издвоивме неколку впечатливи комбинации.

Г-ѓата Билјана Беличанец-Алексиќ секогаш внимава на изборот на соодветен стајлинг за нејзините јавни појавувања и прави успешен биланс помеѓу нејзиниот индивидуален стил и пригодата. Овој пат ја гледаме во елегантна дводелна комбинација потпишана од модната куќа Елена Лука, а која е впечатлив спој на бела транспарентна кошула со волуменозна јака збогатена со тантела и цветни мотиви и црни панталони странично украсени со дискретна лента.

Во продолжение ви го пренeсуваме амбиентот од црвениот килим и неколку секвенци од сцената.