Францускиот анимиран филм „Father“(Татко) на Сантјаго Бу Грасо ја освои првата награда, Златна тула, на четвртото издание на Меѓународниот фестивал за анимиран филм „Анимакс Скопје Фест“, што се одржа од 4 – ти до 6 – ти декември во Кинотека на Македонија.
На затворањето на фестивалот во саботата беа доделени и останатите награди. Сребрената Тула му припадна на „Man on the chair“(Човек на столчето), во француско – јужнокорејска продукција, а Бронзената Тула на „Castillo Y El Armado“(Кастиљо и наоружаниот) од Бразил.
Наградите ги додели жири – комисијата во состав: М-р Мими Ѓоргоска – Илиевска од Кинотека на Македонија, Андреј Рубетској од Русија – режисер, аниматор, сликар и сценарист, Дорис Бауер од Австрија – ко- директор на филмскиот фестивал за краток филм Еспресофилм и главен куратор на меѓународната програма за фикција и документаристика при VIS (Vienna Independent Shorts) и Диме Ратајковски – главен и одговорен уредник на МТ и автор на повеќе од 50 документарни емисии, филмови и репортажи.
Наградите Златна и Сребрена Тула ги подигна Бранко Чобанов од Францускиот Институт во Македонија.
За најдобар филм за деца, пак, беше прогласен „Space Dog Family“(Семејството вселенски кучиња), а наградата ја прими гостинот од Русија, Андреј Рубетској, кој е дел од тој проект. За него гласаа дечињата во трите фестивалски денови.
Оваа година мото на фестивалот е „Ако сите светат, ти блескај“. На четвртото по ред издание на „Анимакс Скопје Фест“, беа прикажани 52 филмови, од кои 44 за возрасни и осум за деца. Се пријавија рекордни 326 анимации од 52 земји во светот, а селектор на програмата беше Благоја Куновски Доре.
Организаторите се презадоволни од годинешното издание на фестивалот и полната сала во трите денови во рамки на кои беа прикажани по 100 минути анимација.
„Анимакс Скопје Фест“ е во организација на продуцентската куќа Аурипигмент, во соработка со здружението на гараѓани Креативен Цента Тинтири – Минтири од Скопје, со поддршка од Министерството за култура на Република Македонија и Град Скопје, а во соработка со Кинотека на Македонија.