Елена Лука традиционално ги дотера матурантките од „11 Октомври“

Модната куќа Елена Лука веќе неколку години наназад, традиционално ги креира матурските стајлинзи за матурантките од Домот за деца без родители „11 Октомври“.

Матурантките и од оваа генерација со сигурност ќе се чувствуваат убаво и пријатно на нивната матурска забава, со оглед на тоа дека ќе ги носат креациите специјално дизајнирани за нив и според нивните желби.

„На вниманието и искреното пријателство, децата секогаш знаат да одговорат со бесценета насмевка и благодарност што е повеќе од голем мотив со задоволство да создаваме и креираме за нив“, велат од Елена Лука.

Секоја од креациите за матурантките е приказна за себе и е одраз на индивидуалниот стил на девојчињата, но сепак она што е заедничко за сите нив е што соодветно се прилагодени на нивната возраст и зрачат со младешка енергија.

Доминираат пастелните нијанси и едноставните и минилистички кроеви, како и романтичните миди фустани, но и модернистички црно-бели комбинации.