Легендарниот моден дизајнер Оскар де ла Рента кој половина век му го посвети на креирањето на совршени парчиња од високата мода, почина на 82 годишна возраст.
Неверојатниот уметник креираше фасцинантни парчиња за некои од најголемите жени во светот меѓу кои и Џеки Кенеди, но и многу први дами кои беа обземени од неговата работа.
„Секогаш ќе се сеќаваме на него како човекот кој им овозможи на жените да се чувствуваат убаво“, изјави поранешната дама на САД, Лора Буш која беше една од најголемите обожавателки на брендот.
Смртта на дизајнерот беше потврдена од неговата жена Анет де ла Рента, која посочи дека истата настанала како компликација од ракот што тој го имал и дека дизајнерот починал во понеделникот вечерта во својот дом во Конектикат, опкружен со неговото семејство и кучињата што ги обожувал.
„Единствената реалност во животот со која мора да се соочите е дека сте се родиле, живеете и еден ден ќе умрете“, изјави неповторливиот дизајнер во јуни 2013 – тата година.
Токму тогаш, тој посочи и дека сите мислат дека ќе живеат вечно. Она што еден човек никогаш нема да го прифати, повтори тој, е фактот дека нема да живее вечно.
„Она што единствено треба да го знаеме и она поради што говорам за ваквите работи, е фактот дека сите мора да го цените секој ден од животот и да уживате во него“, изјави тогаш дизајнерот.
Меѓу последните неверојатни креации што ги изработи дизајнерот, беше фасцинантниот венчален фустан на новата омилена холивудска девојка Амал Клуни, која блесна со сиот свој сјај на венчавката со Џорџ Клуни во Венеција.
Дизајнерот неодамна ја лансираше и целосната колекција венчаници, од која дел беше и фустанот на Амал, за кој веруваме дека ќе биде едно од најпродаваните парчиња на сите времиња.
Подеднакво шармантна и неверојатна беше и пролетната колекција што дизајнерот ја претстави во рамки на годинешната модна недела во Њујорк, која по кој знае кој пат ги остави без здив сите негови обожавателки.
Дека неговите креации ќе останат запаметени, сведочат и изјавите на некои од најголемите холивудски ѕвезди кои посочија дека и покрај смртта на дизајнерот, неговиот бренд, сега на чело со Питер Копинг, ќе продолжи да прави сите тие да се чувствуваат убаво!
Во продолжение во галеријата, погледнете некои од највпечатливите моменти во животот на големиот дизајнер и некои од неговите фасцинантни креации!