Олгица Ѓоргиева ги ослободува жените од формалноста во деловниот свет

Македонската дизајнерка Олгица Ѓоргиева подготвува нова, предновогодишна бизнис колекција како продолжение на нејзината последна „Ослободување“.

Оваа колекција на дизајнерката го носи називот „Unrestricted“, а таа ќе каже дека станува збор за колекција преку која жените ќе се ослободат од формалноста и стереотипите во бизнис стилот.

„Оваа идеја ја имав веќе подолго време, но сега некако дојде вистинскиот момент да ја реализирам. Секое парче од колекцијата е носливо и всушност се работи за многу едноставни парчиња“, вели Олгица за fashionel.mk.

Нејзината нова бизнис колекција на македонската публика ќе и биде претставена преку истакнати македонски бизнис жени кои ќе ги носат 10 – те комбинации на парчиња што дизајнерката засега ги има подготвено.

„Колекцијата ќе се шири сезонски, односно ќе има нови парчиња за секоја нова сезона. Многу ми е драго пред се, што сите жени се согласија да ја презентираат целата моја колекција и што сите тие се на различна возраст“, вели Олгица.

Целата колекција на дизајнерката ќе се промовира на 13 – ти месецов, а веднаш потоа истата ќе биде пуштена во продажба.