Ова се најкретивните „улични“ фотографи со бескрајна модна инспирација!

Време е да ги запознаете најдобрите и најкреативни фотографи кои ги „ловат“ најдобрите модни трендови и комбинации на различни индивидуи ширум светот!

The Sartorialist

Еден од најпознатите „улични“ фотографи Скот Шуман почна да работи на својот одличен блог уште во 2005 – тата година и правеше сѐ подобри и подобри фотографии како креативна врска помеѓу модата и нејзината поврзаност со секојдневниот живот. Иако тој секогаш фотографиите ги прави врз основа на комбинациите што ги забележува, тој скоро секогаш сака зад комбинацијата да ја долови и вистинската приказна што се крие зад личноста што ја фотографира.

Tommy Ton

Креативниот Томи Тон започна со својата одлична работа некаде кон 2007 – та година кога за прв пат присуствуваше на модните недели во Париз и Њујорк. Токму оттогаш, тој ја документираше секоја модна недела на еден сосема поинаков начин. Во 2008 – та година, Томи го создаде и неговиот блог Jak and Jil. Тој и денеска е еден од најомилените фотографи помеѓу модните уредници и дизајнери, а дефинитивно најголем миленик е на Карин Ројтфилд.

Bill Cunningham

Уникатниот Бил е дефинитивно еден од најпознатите „улични“ фотографи во Њујорк. Тој денеска има 85 години, а веќе со децении со својот велосипед „талка“ низ градот во потрага по најдобрите модни комбинации. И самиот е познат по неговиот одличен стил, кој скоро секогаш е „зачинет“ со сино палто. Доколку ве заинтересира, а веруваме дека е така, сите негови фотографии можете да ги најдете во посебната видео секција на тиражниот Њујорк Тајмс, позната едноставно под името „On the street“.

Altamira NYC

Abbey Lee Kershaw for Altamira

Тој дефинитивно ги прави најдобрите фотографии од светските модели кога тие не се на „должност“. Крег Аренд кој работи под псевдонимот Altamira NYC, секогаш сака да ги фотографира и помалку познатите модели и на неговите обожаватели покрај фотографиите, да им понуди и неколку интересни факти за девојките, што никој не ги знае!

Garance Dorѐ

Улична мода, модни ревии, модни забави...да, таа го прави сето тоа и тоа на одличен и уникатен начин! Поранешната партнерка на Скот Шуман, Garance Dorѐ покрај тоа што прави одлични стрит стајл фотографии, црта и неверојатно женствени илустрации кои секогаш сакаме да ги погледнеме. Покрај тоа што на својот одличен блог постојано „закачува“ шик фотографии од уличен стил, таа скоро секогаш ги посочува и местата каде можете да ги купите парчињата од комбинациите на девојките што таа ги фотографира.

Backyard Bill

Elisa Nalin for Backyard series

Шармантниот Бил почнал да се занимава со оваа професија сосема случајно, откако на една забава во неговата градина во Бруклин во 2008 – та година, му се допаднала идејата да ги фотографира неговите пријатели. Откако тоа добро му тргнало, од неговата градина тој тргнал низ домовите на сите оние кои сакале да се фотографираат, но покрај одличните фотографии, тој секогаш раскажува и цела една приказна за нив.

Face Hunter

Швајцарскиот „уличен“ фотограф Иван Родиќ го основаше неговиот одличен блог Face Hunter во 2006 – тата година и оттогаш стана еден од најпознатите светски фотографи познати по одличните фотографии од глобалната мода.

Gunnar Hammerle

Уникатниот Гунар секогаш ни овозможува да уживаме во неговиот одличен избор на девојки и момци со супер стил од улиците низ Германија. Секогаш храбар и смел, тој на неговиот блог Style Clicker објавува навистина освежувачки фотографии од посетителите на модните недели во едно поинакво светло.

Le 21ѐme

Адам Кетз е вистинскиот човек доколку сакате да погледнете одлични стрит стајл фотографии. На неговиот блог секогаш ќе пронајдете дневна доза на стил од различни градови ширум светот, а ќе можете да уживате и во прекрасните фотографии во висока резолуција.