Дискверд прославуваат 20 години кариера

Модното дуо Дискверд вчера ја отвори машката модна недела во Милано. Со ревијата што ја прикажаа, тие всушност го одбележаа и својот јубилеј, 20 години во модната индустрија.

Ако судиме по колекција, која вклучуваше и неколку женски модели, следната есен-зима ќе се комбинираат џинсот и кожата. Добро проверена комбинација, што според ова модно дуо заслужува повторно да се најде во центарот на вниманието. Крзното е исто така неизоставен дел, најчесто имплементиран во модните додатоци и палтата, јакните, односно капутите.

Освен оној урбан дел, колекцијата содржи и елегантни парчиња, па така трендот на тесни панталони до глужд продолжува. Елеци со везена орнаментика, односно везени апликации на панталоните, се исто така нешто што Дин и Ден го препорачуваат како и тенките пеперушки.

Модниот бренд е познат по колоритноста, па таа иако овој пат не беше силно изразена, бидејќи се употребуваа стандарните бои за есен-зима како кафена, црна, бела, кариран дезен и слично, сепак дизајнерите вклучија неколку парчиња и со интензивна розова боја.

Дали ќе се одлучите за парче облека, како што е пинк капутот или јакната, или пак за парче каде розовата е моден детаљ, изборот е ваш, но важно е да се истакнете од толпата. Кога се модните додатоци во прашање, колекцијата комплетно е испратена од волуменозни крзнени капи и волнени шапки.

Создавајќи ја оваа модна приказна, дизајнерите одлучиле да опфатат повеќе стилови, но сепак да ја задржат урбаноста по која се препознатливи.

Инаку, за потсетување, Дин и Ден Катен од Онтарио , Канада, пристигнуваат во Италија во 1991 година, за во 1995-тата година ја претставуваат нивната прва машка колекција под името Dsquared2. Веќе следната година се дел од учесниците на Миланската модна недела.

Дин и Ден

Од 2000-та па наваму, нивната кариера оди во нагорна линија. Во 2002-та година ја претставуваат првата женска капсулна колекција исто така во Милано, а пред тоа ги дизајнираат костимите за Мадона за видеото Don’t Tell Me.

Мадона во Дискверд

Во нивното портфолио спаѓа и соработката со Кристина Агилера, за нејзината светска турнеја во 2003, наградата La Kore за најдобри дизајнери истата година, по што следеа и други модни награди за најуспешен бренд. Истата година го направија и дизајнот на ексклузивна комеморативна патика за Олимписките игри во Атина во 2004. Тие ги дизајнираа и дресовите на Јувентус и Барселона,  во 2007 година ја создадоа и првата колекција на женски чевли. Во текот на овие 20 години отворија и бројни бутици и тоа во Капри, Киев, Истанбул, Хонг Конг, Кан, Сингапур, Париз, Токио, Кипар, Москва, Лос Анџелес, Миконос, Баку, Њујорк...

Дуќанот во Милано

Имајќи го предвд начинот на кој работат и како се развиваат, веруваме дека овој бренд и во следните 20 години ќе биде во самиот врв.

Во продолжение погледнете ја последната, роденденска колекција.