Есенското виножито на Ким Џонс во најновата колекција на Фенди

Неодамна, дизајнерот Ким Џонс го зеде кормилото на Фенди, кое претходно му припаѓаше на Лагерфелд. 

Негово првенче беше колекцијата висока мода која си имаше свои, не толку славни моменти: самата колекција беше некоја бледа верзија на она што го опишува Фенди како бренд, а да не зборуваме за ликот на Деми Мур за кој јавноста не престана да шушка.

Сега на ред дојде ready to wear колекцијата која се покажа дека на Џонс му е јака страна, бидејќи ги исполни сите очекувања. Делува уредно спакувано, со кроеви кои ја нагласуваат силуетата, со парчиња кои апсолутно можат да се носат во секојдневието, а изгледаат луксузно и убаво и со сите актуелни модни трендови инкорпорирани во колекцијата - големи реси, вештачко крзно, пропорционални парчиња (горе кроп топ - долу подолго здолниште и обратно; долу шорц горе капут), oversize чанти и по некој принт.

Трендот кој најмногу остава впечаток се монохроматските комбинации, односно облекувањето од глава до пети во една боја, а Џонс тоа го прави на многу убав начин.Уште поубава е и есенско-зимската палета на бои за која се одлучил.

Колекцијата започнува со беж варијанти па на момент ќе помислите дека е Мајкл Корс во своите златни денови. Сепак, изгледа прекрасно.

Раскошноста продолжува во шампањ свилени парчиња, а истата текстура се задржува и во фантастичните дизајни на слип фустани во некоја совршено суптилна нијанса пастелна вишња боја.

Плетенините се во сивкасто-маслинеста варијанта, а колекцијата потоа преминува во бели фустани и капути со фантастичен крој.

Завршува со елек-фустани и одела во металик црна варијанта.