Ако сте верни фанови на култната серија “Пријатели“, тогаш сигурно знаете дека омилената Рејчел Грин долги години работеше во Ралф Лорен, а дизајнерот дури и се појави во една од епизодите.
За да ја прослави 25 годишнината од првата епизода на серијата и неговата улога во истата, 79 – годишниот дизајнер создаде колекција инспирирана токму од Рејчел Грин наречена „Wear to Work“.
Колекцијата на познатиот бренд е наменета за сите деловни жени, а во истата ќе најдете волнени костими, ролки, кожени панталони, миди или мини здолништа од велур, капути, јакни од супер впечатливи материјали и парчиња од вештачко крзно.
Секако, дизајнерот не заборави ниту на омилениот принт на неговите обожаватели, па така стави и неколку парчиња во пруги.
Она што е интересно е тоа што на местата каде ќе се продаваат парчињата наместена е инсталација – реплика на познатото кафуле Central Perk кое ќе се сели од место на место каде ќе биде изложена колекцијата.
Колекцијата е достапна во стоковните куќи Блумигделјс и онлајн на страната на брендот.