Шанел за прв пат допатува во Африка со фантастичното модно шоу Métiers d’art

Францускиот луксузен бренд Шанел за прв пат допатува во Дакар, Сенегал со фантастично модно шоу за традиционалната Métiers d'art ревија.

800 гости меѓу кои и првата дама на Сенегал, Марием Сал, уживаа во современата проекција на Вирџин Вјард на богатата африканска култура интерпретирана преку модниот код на Шанел – раскошниот твид, повеќедимензионално искористен во духот на естетиката на 70-те години на минатиот век.

Од друга страна, доживувањето на Африка и на старите текстилни занаети, како дел од искуството што и претходело на колекцијата, ѝ даваат дополнителен социолошки и културолошки контекст автентично пренесен преку боите и бесконечно инспиративните дезени на „црниот континент".

Така бохо естетиката на 70-те е комплетирана со колоритот на африканската култура, како ефективен спој кој одлично функционира во една модернистичка целина.

Ревијата е одржана во поранешната Палата на правдата, племенит простор кој на најверодостоен начин ја пренесува идејата на Вјард за една космополитска приказна која ги врзува времето и просторот.

Фото: Vogue