Пробајте ги највкусните мафини од банана!

Во текот на студената зима нема ништо подобро од топла атмосфера во вашиот дом и мирис на нешто слатко!

Празниците се совршено време да пробате некои нови рецепти на кои ќе се израдува целото семејство, а и вие ќе уживате во истите.

Има една девојка Ана која стои зад хрватскиот блог „Prstohvat soli“ која постојано објавува фантастични и навистина едноставни рецепти.

Она што ние денеска ќе ви го предложиме, а доаѓа токму од нејзиниот блог се овие прекрасни и неодоливо вкусни мафини со банана.

Потребно за 12 мафини:

250 грама брашно

Една лажица прашок за пециво

Една лажица сода бикарбона

Една лажица цимет

Малку сол

Едно јајце

Три банани  (помеки)

100 грама путер

100 грама шеќер

За фил:

Две лажици кафеав шеќер

Две лажици брашно

Две лажици ладен путер

Две лажици овесни снегулки

Цела рака ореви

Подготовка:

Загрејте ја печката на 180 степени и подгответе ги калапите за мафини со хартиени корпи. Потоа подгответе го филот – во длабок сад ставете го шеќерот, брашното и путерот па направете трошки од тоа, а не хомогена смеса. Додадете ги овесните снегулки и сецканите ореви. Измешајте повторно, но гледајте смесата да не се соедини. Ставете ја во ладилник.

Почнете да ги подготвувате мафините со тоа што ќе го стопите путерот и ќе го оставите да се излади. Во длабок сад измешајте ги сите суви состојки за мафините. Во друг сад скршете го јајцето, додадете ги сецканите банани и згмечете ги со лажица. На смесата додадете го стопениот путер и шеќерот, измешајте па додадете ги сувите состојки и мешајте додека смесата не се соедини. Наполнете ги калапите, но оставете место за крцкавиот фил што ќе го додадете на крајот. Мафините печете ги 25 минути и изладете ги пред да ги послужите.