Манекенот и модел Павле Николовски, иако сосема случајно се најде во светот на модата, сепак после двегодишното искуство во оваа специфична професионална сфера, е еден од поуспешните македонски машки модели.
Предизвикот и можностите кои ги отвораат ангажманите во манекенството ја заскокоткале неговата љубопитност и желба да се посвети на оваа работа. Со неговите 24 години, фит формата и неодоливата моќ за трансформација што е еден од основните предуслови за прогресивна манекенска кариера, за Павле може да констатираме дека одлично се снаоѓа во, до неодамна непознатиот терен за него.
Сепак, покрај физичките предиспозиции, дисциплината и одговорноста се значајни предизвици во професионалното манекенство, на кои Николовски бескомпромисно одговара, како што посочува и Алек Наумовски од неговата матична агенција Моделс ИН.
Еден од неговите последни ангажмани беше и фотосесијата со трендовски машки комбинации за едиторијал за Fashionel.
Неговите амбиции се насочени кон глобалната модна индустрија и желба да соработува со врвни светски имиња како Баленсиага, Гучи, Александар Меквин, Том Форд... Му посакуваме среќа во остварувањето на неговите амбициозни, но не и невозможни цели!