Годинешното 43. издание на Интернационалниот фестивал на филмска камера „Браќа Манаки", традиционално ќе се одржи во Битола, но ќе трае подолго, поточно 8 дена, почнувајќи од 20 до 27 август.
Во главна програма ќе се натпреваруваат вкупно 14 играни филмови, наградени остварувања од европски и светски фестивали, Меѓу другото ќе се натпреваруваат и два македонски филма, „Снежана на крајот умира" на режисерот Кристијан Ристески и „Мими" во режија на Даријан Пејовски.
- Годинава фестивалот ќе трае подолго, ќе трае осум дена и ќе изобилува со програми. Годинава имаме 14 играни филмови, 12 во кратката програма, ја враќаме документарната програма, студентската програма повторно ја враќаме, ќе имаме гости од светски академии за филм и мак корнер програмата. - истакна директорот на ИФФК „Браќа Манаки", Сименон Мони Дамовски за медиумите за време на прес-конференцијата која се одржа во средата. - Годинава имаме добитник, симболот на „Браќа Манаки", имаме исклучителен добитник, што се смета за пионер на дигиталната камера и е првиот оскаровец кој добил Оскар за филм снимен со дигитална камера, а тоа е господинот Ентони Дод Ментл кој е снимател на филмовите на Ларс фон Трир, на Дени Бојл, и бројни холивудски филмови. Сестран кинематографер со документарни остварувања на дигитални долгометражни, краткометражни филмови. Како и браќата Манаки вистински пионер во својата област. Тој ќе ни дојде и ќе биде гостин во Битола, ќе ја прими наградата која е симболот и знакот на нашиот фестивал. - додаде тој.
Според Слаѓан Пенев, селектор на долгометражната натпреварувачка програма, во рамките на фестивалот ќе се прикажуваат и по два и по три филмови во една вечер во големата сала во Домот на културата во Битола. На оваа листа се вбројуваат и „Тркалото на среќата и фантазијата" од Рјусуке Хамагучи, канскиот победник „Триаголник на тагата", како и шпанскиот филм „Алкарас", кој е добитник на „Златна мечка" во Берлин.
Селекторката на документарната програма, Кумјана Новакова, посочи дека ИФФК „Браќа Манаки" е важен фестивал за виталноста на нашето општество, потенцирајќи го фактот дека 70 проценти од филмовите ги потпишуваат жени, односно женскиот сензибилитет отвора нов израз и претставува промена на традицијата со која фестивалот сака да раскине. Новакова исто така истакна дека програмата наедно е и простор на креативна храброст затоа што со селекцијата се начнува во доку- фикцијата и на хибридните филмски јазици.
Режисерката Марија Апчевска, која е селектор на кратката програма, пак, рече дека е ставен фокусот на кратки филмови кои имаат извонредна фотографија, бидејќи кинематограферот е значаен за наративот на филмот.
- Имаме селектирано 12 филмови од цел свет. Особено ми е задоволство што во изборот имаме и филмови кои се снимени од жени кинематограферки. Имаме и наши домашни македонски филмовиа се филмови кои веќе биде на светски фестивали, наградувани се, но и имаме нови гласови, филмови на режисери и кинематографите чие време допрва доаѓа, а тие во Битола ќе уживаат на нашиот фестивал. - кажа Апчевска, додека пак Ѓорѓи Пулевски кој е селектор на студентската натпреварувачка програма насловена „Први чекори" откри дека станува збор за визија на фестивалот кој е една појдовна точка на младите кинематографери.
- Им даваме елан, инспирација и препознавање на нивниот квалитет и талент. Избравме 18 филмови од 17 земји во селекцијата од најголемите филмски академии од Лондон, Виена, Полска, Чешка, Минхен, Мадрид итн. Ќе одлучува интернационално жири, а најдобриот кинематографер ќе добие кристална камера 300. истакна Пулевски.