Како помина 22. Моден Викенд Скопје?

Со затворањето на изложбено-продажниот салон „Свесна Мода" во Јавна Соба,  беше означен крајот на тридневното „поп-ап" издание на Моден викенд Скопје чиј концепт вклучуваше шоурум, арт инсталации, студентска изложба, едукативно предавање и богата музичка програма за присутните гости.

Списокот учесници на „CONSCIOUS FASHION POP UP SHOWROOM" го предводеа еминентни и перспективни имиња од земјата и странство: Irina Tosheva, Evgenija Zafirovska, Terziya, Stefanija Naseska, Pssbl, Krenare Rugova, Minnimal, Kotev Ksenija, Seddum, Tessuti Art by Ana Jakim, Meleem, Lipa Ceramics, Меlani Digit, Saksija Urban Pots и Siidess Furniture. Кон мисијата да се промовира најдоброто од одржливиот дизајн во Скопје, како коорганизатор за реализација на проектот, максимална поддршка даде берлинската консалтинг агенција ONLYАFEW, раководена од тандемот Дороти Сара Спехар и Кристина Илиевска.

Последниот ден мина во знакот на eдукација за одржливоста, односно професионални излагања на темата од претставниците на Fashion Revolution, DS Agency и ОNLYAFEW. „Одржливата мода е несомнено тема која има многу простор за истражување и дејствување. Самата соработка со Моден Викенд Скопје е огромен исчекор и добар старт кон потранспарентни практики кои би ја зголемиле отчетноста на брендовите за тоа кој, како ја прави облеката и во какви услови, а со тоа и нејзините влијанија врз животната средина. Заедно со DS Agency и ONLYAFEW на посетителите им изнесовме корисни информации, примери и можни начини на делување, што би ги доближиле до поодржливи модни практики. Исто така ги запознавме со движењето, нашите активности и можностите за идни соработки.'' - изјави Ана Јакимовска, координатор на Fashion Revolution Macedonia.

Во продолжение ви пренесуваме дел од атмосферата преку фотографии.