Мемоарите на Мишел Обама ќе ги читаме на есен

Поранешната прва дама на САД Мишел Обама викендов на нејзиниот Твитер профил наведе дека нејзините мемоари ќе бидат објавени во ноември, а книгата ќе го носи насловот „Becoming“. 

Таа ги опиша мемоарите како „длабоко, лично искуство“.

Мишел и нејзиниот сопруг, поранешниот американски претседател Барак Обама, минатата година постигнаа договор со издавачката куќа „Penguin Random House“ за нивните книги, а се претпоставува дека вредностна на договорот е 30 милиони долари.

Како пренесуваат странските медиуми, дел од средствата од продажба ќе бидат насочени кон „Фондацијата Обама“, а дел од книгите ќе бидат донирани и на непрофитната организација „First Book“. 

Книгата ќе биде достапна на 24 јазика, а ќе биде во продажба од 13-ти ноември годинава. 

Со оглед дека Мишел многу бргу стана една од омилените први дами не само во САД, туку и ширум светот, ќе биде интересно да се прочита нејзината страна од приказната, како млада девојка од Чикаго стасува до прва дама која со своите постапки и дела ги мотивира останатите.

Инаку, во американските медиуми се наведе и информацијата дека следната пролет нејзиниот сопруг, Барак Обама ќе објави исто така книга, но други детали не се откриени.