Наскоро законски прописи за фотошопирани и филтрирани Инстаграм фотографии?
•
6 октомври 2020
Периодов низ медиумите се шират фотошопирани фотографии од познати ѕвезди кои важат за едни од најубавите жени на светот. Инстаграм профилот @godess.women е целосно посветен на тоа да ги „разубави“ со филтер.
Дури ни Моника Белучи, Џулија Робертс која и повеќе пати беше прогласувана за најубава жена од магазинот „Пипл“, или пак Анџелина Џоли, изгледа не се доволно убави според новите стандарди за убавина што се пропагираат на социјалните мрежи, па и тие добија своја фотошопирана верзија.
Пред неполни два месеца, Клои Кардашијан се најде во центарот на вниманието поради нејзините и повеќе од очигледни корекции на фотографиите.
Ова не е нов, ниту непознат проблем. Новите „стандарди за убавина“ успеваат да излажат голем број девојчиња, па целта не е да се биде различен, автентичен, природен, туку да се биде ист како другите. Да се користи ист кармин, иста пудра, да се има иста фризура, иста облека, исти пози на фотографии...
Сепак, за некого, оваа недоволно интересна тема за дискусија, посебно го привлече вниманието на доктор Лук Еванс, член на Комитетот за здравство и социјална заштита, лекар, а воедно член на парламентот на Обиденитетото Кралство. Тој состави Предлог закон, во кој се вели дека луѓето би морале да ги означат фотошопираните фотографии на социјалните мрежи. Ваквата иницијатива доаѓа од тоа што според него не постои доволна свесност дека лажните фотографии на социјалните мрежи „поттикнуваат криза на менталното здравје“ и создаваат „искривен поглед“ на она што се смета за убаво.
Сите социјални мрежи се поврзани со високо ниво на анксиозност, депресија и „страв од пропуштање на нештата“ (fear of missing out - FOMO), а воопшто не е ретка појава со создавање на негативната слика за телото и лоши навики при спиењето.
Воедно, важно е и прашањето зошто луѓето кои се свесни дека гледаат во фотошопирана фотографија која не е ни блиску со оригиналот, се ок со тоа и уште повеќе, упатуваат пофалби?
Едно неодамнешно истражување покажало дека речиси 50 проценти од млади девојчиња на возраст помеѓу 11 и 21 година, редовно користат апликации и филтери со цел на фотографиите да изгледаат „подобро“ отколку во живо.
Статистиката веројатно не е изненадувачка, но апсолутно е тажна и поразувачка.
Можеби далеку поефективно решение би била забрана на користење на такви апликации, особено помеѓу малолетни лица, но од друга страна и нагласувањето дека објавената фотографија подлежала на фотошоп е добар почеток, што би влијаел на тоа девојчињата да не се стремат кон изглед на познати ѕвезди, блогери, инфлуенсери, кој реално и не постои, па оттаму и фрустрацијата што се различни од нив (која води и до други проблеми) би била далеку помала.
View this post on Instagram
