Внимателно ги проследивме сите дизајнерски колекции за следната зимска сезона кои беа презентирани на Модната недела во Париз која финишираше вчера, а како резиме на тоа, ги селектираме нашите десет омилени изгледи од модната писта. Иако воопшто не е едноставно да се направи една генерална слика на нашите фаворити, сепак во продолжение ќе имате можност да погледнете колаж од различни стилови, сосема спротивни дизајнерски гледишта за идните трендови, богата колор палета, авантуристичка игра со форми, богат избор на детали, а сепак со еден заеднички предзнак: неминовна впечатливост. Во основа, приоритетот е на слоевитите комбинации, миди здолништата, фасцинантниот спој на принтови и дезени, едноставните минималистички кроеви, но и елегантите женствени силуети.
Валентино потврди дека уметноста може да биде нослива. Интензивните бои, точкастиот принт на миди здолништето во А линија и луксузот да се ужива во удобоста, а истовремено да се изгледа шик, се основните предиспозиции на оваа комбинација.
Балансот помеѓу женствено нагласениот струк, мистичниот приказ на сексапилот и релјефната игра материјалите е совршено постигнат во овој избор од Балман.
Класичен париски шик: крзнена јака на краткото палто, баретка и панталони во двобојната комбинација на Џон Галијано.
Ели Саб е докажан фаворит на жените вљубени во елегантната класична сензуалност. Ова е апсолутен избор за свечен момент: паралелно со елеганцијата, е проткаена едноставност сведена на минимализам.
Емануел Унгаро направил микс на се што во мометов е актуелно: црно-бел контраст, миди здолниште со висок струк и кожени детали.
Фаворитот на „уличните“ протагонисти, Кензо ќе владее во уличната мода и следната сезона. Асиметричен крој, XXL патенти во преден план и омилената боја на следната зимска сезона: портокалова.
Тотално урбано и секси. Ланвин во едноставноста на формата и строгите линии, вметна волуменозно крзно во предниот дел на палтото на преклоп.
Во својата премиерна колекција за Луј Витон, Николас Гескиер експериментираше со спојот на дезени, материјали и бои. Ова е варијанта за жените си изразена индивидуалност.
Во комплетниот приказ на новата линија на Сен Лоран, доминираа мини здолништата комбинирани со високи чизми и палта со кратка и средна должина во А крој. Овој монохроматски, мрачен готик изглед е нашиот фаворит.
Изабел Марант го продолжува трендот на андроген изглед во тотално кул и урбана варијанта. Ни се допаѓа хармонијата во спојот на зелените тонови, спортскиот дух на избраните парчиња и ноншалантниот изглед.