Модно жири од Тони наградите во Њујорк

67-издание на наградите „Тони“, беше момент кога можевме да ги погледнеме големите холивудски ѕвезди како чекорат по црвениот килим во Њујорк. Освен добиените награди  за најдобрите достигнувања во Бродвеј, актерските ѕвезди ги покажаа и своите изгледи во брендираната облека, која ја презентираа со позирање пред камерите и фото апаратите. Критиките и коментарите од моден аспект не изостанаа на светско ниво, а не ги заобиколивме и ние. Дизајнерката Фросина Ангеловска направи  свој преглед на тоа кој како изгледаше на свеченоста.

Дебра Месинг

Отмено, воздржано, елегантно но сепак сигурно. Недостасува малку возбуда во изборот на овој аутфит.

Сигурни Вивер

Фустанот одлично и прилега, достоен и прибран. Иако во кројот не е ништо спектакуларно, моделот е иновативен а бојата е трендовска и го освежува.

Скарлет Јохансон

Тренди и шик. Остро и чисто. Идеално постигната елеганција со крој, боја, шминка и аксесоари, се до моментот кога е разбиено со животински прит кој допринесува за свежина на стајлингот.

Ана Кендрик

Преубав уникатен асиметричен крој, спој на бои кој е сосема адекватен а истото важи и за минималистичките аксесоари кои не го фрлаат во сенка фустанот туку одлично го надополнуваат.

Синди Лопер

Премногу тантела на голема површина. Кројот е премногу застарен и не оди во спој со екстра младешката фризура. За чевлите останувам без коментар!