Директорот на Левис советува да не ги перете фармерките

Кога станува збор за одржување на фармерки, сигурно сте прочитале бројни совети како треба правилно да водите сметка за вашиот омилен чифт. Но генералниот директор на култниот бренд Левис, Чип Берг тврди дека фармерките не треба да се перат никогаш!

Тој вели дека самиот се придржува кон ова правило и дека своите фармерки не ги испрал повеќе од една година.

-Знам дека звучи одвратно, но верувајте ми дека така е најдобро. Можете да ги исчистите поминувајќи ги со сунѓер или да ги исчеткате. Верувајте дека секој искусен произведувач и љубител на џинс ќе ви го каже истото, вели Берг.

Левис неодамна прослави 141 година постоење, а за уште подолготраен квалитет на она што го изработуваат, наместо перење велат дека треба да се замрзнува во фрижидер. Замрзнувањето било  доволно да се прави еднаш месечно за да се неутрализираат непријатните миризби и бактериите.

Колку чудно и да звучи, некои личности веќе го прифатија овој совет, а меѓу нив е и водителот Андерсон Купер кој исто изјави дека омилените фармерки ги пере еднаш годишно, а ги замрзнува во фрижидер.