Новото, 23 издание на „Златна бубамара на популарноста“ се одржа вчера во арената „Борис Трајковски“. Под мотото „Нема правда, има Бубамара“, се пошегувавме одново на своја сметка, но и се доделија наградите на најуспешните од минатата година.
Меѓу нив беше и екипата на тв ситкомот „Преспав“. Освен што ја добија наградата за „Најдобар тв проект“, тие ја почестија публиката и со нова песна, насловена како „Цел живот го преспав“.
Тијана Дапчевиќ, која во серијата ја гледаме како Германката Ула, довербата за изгледот повторно ѝ ја даде на домашната модна куќа „Елена Лука“.
Таа на сцената блесна во трендовско парче во впечатливи нијанси. Се работи за одело, кое е вистински моден хит веќе неколку сезони наназад, а кое Тијана одлично умее да го носи.
Имено, како и досега, тимот на македонскиот бренд направи комбинација на трендовско парче и модниот сензибилитет на Тијана, создавајќи стајлинг во кој таа ќе изгледа впечатливо, моќно и сценски, а воедно ќе се чувствува пријатно и удобно.
Со интересната и привлечна комбинација на бои, материјалот со пулејки кој е апсолутно модно доминантен во моментов и кројот кој ѝ ласка на нејзината појава и фигура, тимот на „Елена Лука“ и Тијана испишаа уште една успешна модна приказна.