Десет модели капути кои ќе ја одбележат претстојната сезона

И додека летната еуфорија полека стивнува,а зимската зазема стартна позиција, модните дизајнери не одмораат. Нивните есенски колекции одамна се спремни  и пуштени во продажба. Ние решивме да направиме селекција на најдобрите модели капути кои ќе ја одбележат студената сезона.

Витална флексибилност, капут кој можете да го комбинирате и преку ден, но совршено ќе се вклопи и во вашиот вечерен изглед.

Квалитетот е важен во изборот на капут. Земете в предвид дека тој треба да биде и удобен, топол и да има совршена линија која ќе биде во идеална хармонија со вашата фигура.

Капути со принтови, за некого звучи застрашувачки, но доколку се одлучите за вистинскиот дезен и боја, може да изгледате класично, едноставно и елегантно.

Изборот на капут, во живописна, пастелна нијанса може навистина да ви ја обои тмурната зима. Бидете храбри и направете ваков смел чекор.

Капут во војнички стил, тренд кој се враќа од година во година. Како и да е овој модел би им одговарал на сите оние кои сакаат чисти линии, рамни контури и во себе носат спортски дух зачинет со многу женственост и елеганција.

Бледо розовата боја е дефинитивно тон кој ќе ја одбележи зимата. Зара, Дебенхамс и Маркс и Спенсер се решија за розовата нијанса и не погрешија. Многу отмено и дамски.

Големината е важна, кога се работи за избор на капут. Сепак избегнувајте ги предимензионираните модели бидејќи на тој начин изгледате како на себе да носите вреќа, а не палто.

Твидот послужи како основа на многу дизајнери, за изработка на капути. Сигурна и модерна варијанта, која од година во година е се пософистицирана.

Капут без јака. Хит за оваа сезона, особено откако се појавија јаките кои се изработени од секакви материјали и ткаенини со многу украсни парчиња накит.
Одличен начин секој ден да понудите различна визија на вашето зимско капутче.

Колор блокот како алтернатива се наметна мината сезона, а се задржа и за претстојнава. Експериментирањето со неколку бои знае да биде мошне интересно, а ако на тоа ги додадеме геометриските форми, се создава илузија на совршена женска силуета. Ако одберете токму ваков модел ќе бидете ем модерни, ем комфорни, ем згодни.