Имате стар килим со ориентален дезен? Дајте му простор во модерниот ентериер

Пред години на нашиве простори, поголемиот дел од домаќинствата наликуваа едни на други во однос на уредувањето на домот. Пазарот не нудеше огромен избор на мебел и декоративни елементи, па тоа ги ограничуваше можностите за неговото ентериерно стилизирање.

Имавме слични кујни, дневни и спални, па дури и деталите не правеа огромна разлика. И меѓу сите тие декоративни елементи, еден од базичните и најзастапените беше килимот со ориентален дезен.

Во различни димензии и мотиви, овој килим естетски ја збогатуваше атмосферата во домот.

Низ годините, понудата на пазарот драстично се промени исто како и стиловите на ентериерно уредување, добивајќи различни правци, нијанси и огромни можности за бирање.

Па иако последниве неколку години, генералните впечатоци се дека во модерниот ентериер доминира минимализмот и сведениот дизајн, секогаш е оставен простор за експериментирање, авторски печат или пак истакнување на автентичниот дух на просторот преку уникатни детали.

И токму тука доаѓа на ред приказната за килимот со ориентален дезен.

Одлично се вкопува во идејата за модернистички уреден дом. Но, и подалеку... Ова автентично парче го збогатува амбиентот и се прилагодува на ентериерот, независно во каков стил е уреден. Подеднакво го оживува просторот и му дава дополнителна естетска вредност и креативна сила, и кога домот е уреден во традиционален стил и кога доминира скандинавската естетика.

Ако сѐ уште поседувате ваков килим, дозволете ни да ве мотивираме како да го имплеметирате во вашиот дом.