Македонски дизајнери се претставија на модната недела во Косово

Изминатиов викенд во Приштина се одржа Меѓународната модна недела 2015, каде учество земаа нашиот етаблиран дизајнер Ненад Секирарски и младиот креатор Златко Јовановски, како и Менсур Алими.

Ова не е прво претставување на Секирарски пред тамошната публика, што воедно беше и уште еден предизвик за дизајнерот.

-Ова е мое второ претставување пред косовската публика и речиси после 7-8 години и сосема нов тим на организатори сметам дека косовската модна сцена иако млада и во подем, чекори напред. На покана на продуцентот на настанот Илир Геци и Гечан Груп кои стојат зад целосната организација на проектот публиката имаше можност да погледне 15-тина дизајнери. Моето претставување се случи на 26-ти април, последниот ден од настанот. Се претставив со 21 креација, пред сè од колекцијата што претходно беше претставена во Берлин минатиот ноември, но надополнета со неколку нови креации и неколку од претходната колекција, сè со цел да ја претставам повеќе мојата работа, а не да биде само класично претставување на колекција – вели Секирарски.

Но, соработката не застанала тука.

-Низ разговорите со организаторот и откако ги погледнаа моите креации, заклучија дека би било супер да се направи фотосесија во Скопје и со тоа да се промовира настанот. Тоа беше одлично искуство, со професионален тим во кој покрај мене како дизајнер учествуваше и Даниел Николовски чиј тим беше задолжен за шминка и фризура – изјави Ненад за Fashionel.

&feature=youtu.be

Одлични впечатоци носи и младиот Златко Јовановски:

- Организацијата беше на високо ниво. Работата со професионалци е одлична и секогаш тече во најдобар ред. За мојот краткометражен филм ми го отстапија огромниот лед екран, кој овозможи сцената да биде токму таква каква што замислив. Што се однесува до публиката, и нивните впечатоци беа само позитивни и интересни за мене како појава. Остварив многу контакти и бизнис понуди, за кои не би зборувал однапред- ни кажа Јовановски.

Покрај дизајнерите, дел од овој моден настан беа и четири манекенки од Македонија (Елена Анѓеловска, Антонија Локвенец, Ивана Ѓеорѓиевска и Ангела Ставреска), кои заедно со своите колешки од Косово, Албанија и Турција ги носеа моделите од сите креатори-учесници.

Оваа модна недела во Косово се одржа по седми пат, а покрај нашите, публиката ја виде и работата на неколку дизајнери од Косово, Албанија, Турција, Франција и Швајцарија.

За кореографијата на ревиите беше ангажиран познатиот моден кореограф од Турција, Асли Чагил, а специјален гостин на настанот беше еден од најпопуларните турски актери на Балканот во моментов, Толгаaн Сајишман.

Во продолжение погледнете дел од креациите.