Како изгледа женственост во време на „машка мода“?

... Каролина Ерера го има одговорот на прашањето.

На Њујоршката модна недела под креативно водство на Вес Гордон, ни презентираше колекција во која токму женственоста се распленила со сиот свој раскош и убавина.

Во време кога тенденција се широките и предимензионирани кроеви и облека од машкиот плакар модифицирана во женска, тогаш кога некој дизајнер ќе ни понуди дамска естетика, таквата уште повеќе доаѓа до израз.

А Вес Гордон и со новата линија за Каролина Ерера за сезоната есен-зима 2023, ја продолжи традицијата на модниот бренд, карактеристична по сите симболи за женската елеганција: нагласена половина, романтични флорални мотиви дефинирани преку принт и 3Д форми, потенцирана силуета, и сето тоа прошарано низ една свежа и ведра палета на бои.

Едноставно, ова е колекција која според досегашното искуство на брендот (а искуството се брои во децении или поточно основан е во 1980 година), ги прави жените среќни.

Интересно е да се забележи и присутноста на миксот меѓу дневна и вечерна облека, естетика по која Вес Гордон е препознатлив и умешно знае да ја спроведе во приказната на Каролина Ерера.

Преку скулптуралните форми со тул е доловена посакуваната артистична доза, со која елеганцијата во оваа колекција добива впечатлива завршница.

Фото: Vogue