Версаче ја отвори неделата на висока мода во Париз

Со ревијата на Версаче, вчера во Париз почна неделата на висока мода, каде ќе бидат претставени колекциите за пролет-лето 2014.

А онаа на Версаче беше одличен почеток и најава за тоа што не очекува. Шоуто ги доби сите пофалби, а и многумина се пронајдоа во креациите изработени најчесто од свилено жерсе, збогатени со светки, набори. Кога се боите во прашање, освен стандардната црна, креациите се и во розова, бисерно бела, сина, портокалова...

Освен големото присуство на набори, што веќе напоменавме, моделите се мошне атрактивни и разголени, како оние долгите, така и коктел фустаните. Сепак, има и креации со детали од вештачко крзно. Исто така, фустаните со припиени силуети и корсетска изведба во горниот дел, се едни од највпечатливите.

„Размислував за жена која е моќна, но сепак е женствена и нежна - божица. Ја сакам високата мода, навистина човек може многу да си игра со неа. Буџетот е поголем, па можете да се препуштите на имагинацијата“, вели Донатела.

Со оглед на тоа дека заштитно лице на оваа колекција е Лејди Гага, пејачката беше дел од првиот ред и уште еднаш во живо уживаше во моделите, кои несомнено ќе ги видиме и за време на Оскарите.

Денешниот ден пак започна со ревија на Скјапарели, зад која стои новиот креативен директор Марко Занини, а свој дебитантски настап утре ќе има и Хусеин Чалајан за Вионет.

Во текот на овие пет дена ќе се претстави за првпат и една британска couture  куќа, со традиција повеќе од сто години, Ралф и Русо, а Армани својот успех ќе го прослави и со изложба, која ќе се одржи утре.

Кристијан Диор, Џамбатиста Вали, Жан Пол Готје, Стефани Роланд, Шанел, Улијана Сергенко, Ели Саб, Валентино, Тони Вард се само дел од агендата... Имиња и брендови кои ветуваат многу возбудливи модни моменти.

Во продолжени погледнете ја ревијата на Версаче: