Џонатан Сондерс е новиот креативен директор на „Дајан фон Фурстенберг“

Нова промена во модниот свет. Местото креативен директор во истоимениот бренд на дизајнерката Дајан фон Фурстенберг го доби дизајнерот Џонатан Сондерс.

Сондерс во декември минатата година го затвори својот бренд, а сега го чека сосема нов предизвик.

-Необичната пасија на Џонатан за бои и принтови, неговите дизајни и желба да направи жената да се чувствува убаво го направи совршен креативен лидер на брендот во иднината. Не можев да најдам покул, поинтелигентен дизајнер и едвај чекам да заблеска како наш креативен директор – изјави Дајан фон Фурстенберг во денешното соопштение.

Инаку, Сондерс работеше на своја линија 12 години, а претходно беше дел и од тимот на „Клое“ и „Пучи“. Се шпекулираше дека тој ќе го замени Раф Симонс во „Диор“, но за тоа време тој преговараше со Дајан.

Со оглед на тоа дека и тој и дизајнерката се љубители на принтовите и фустаните, ќе биде интересно да се види како тој ќе се вклопи во естетиката на овој бренд и што ново ќе понуди.